تابع ترتيب مراحل التشطيب...

تابع ترتيب مراحل التشطيب....
بعد إستلام الشقه فى حالتها المبدئيه....طوب أحمر ..
1.. التقسيمات الداخليه.
2.. تمديدات السباكه والصحى.
3.. تمديدات الكهرباء.
4.. النجاره
5.. المحاره والبياض.
6..المصيص للأسقف والكرانيش..
7.. الإعداد للنقاشه والتبطين..
8.. تركيب السيراميك أو البلاط وتشطيب السباكه..
9..ظبط الابواب والشبابيك وتركيب الالوميتال إن وجد..
10..تقفيل علب الكهرباء والتقسيمات..
11..تشطيب النقاشه..والديكورات..
12 التشطيب النهائى للكهرباء..

المرحله الخامسه..
المحاره
المحاره هي عمليه تكسيه الحوائط المبنيه بالطوب بالمونه المختاره للحصول على سطح مستو و وكذا تغطيه أثار الحفر فى الحوائط لتمديدات الكهرباء ومواسير الكهرباء وإعداد الحوائط لعمليه الدهان..

يسبق المحاره عمليه تنظيف شامل للموقع من بواقى المراحل السابقه والرفش والطوب وبواقى غربله الرمل وما شابه وذلك مهم لعده اسباب اهمها ان عمليه المحاره ينتج عنها تساقط مونه بكميه كبيره على الارض وفى حاله الارضيه النظيفه يمكن إنقاذ هذه المونه وإعاده استخدامها ولكن فى حاله الارضيه الغير نظيفه لا يمكن إنقاذ ولو جزء بسيط منها لإنتشارها على سطح غير مستو ولان العامل لن يقوم بمجهود تنظيف مكان عمله قبل العمل...

يجب مراعاه ملء علب واماكن توزيع الكابلات الكهربيه بورق مقوى او جرائد أو بلاستيك او بورق الشكائر المستخدمه فى تعبئه المون ولك حتى لا يسقط المونه فى احدى فتحات المواسير الكهربيه وانسدادها وبالتالى عدم جدوى وجودها لصعوبه تمرير الاسلاك فيها فيما بعد..

المون:
المون الستخدمه فى عمليه المحاره او البياض كما يسميه البعض..تنقسم لعده انواع اهمها نوعان..
المونه الجاهزه :وهى عباره عن مونه جاهزه يضاف لها الماء النظيف فقط وتعطى سطح صلب مصقول ابيض اللون تمتاز بتوفير الخامات فى مرحله النقاشه والدهان كما انها عازل حرارى جيد ومقاوم للحريق وذات وزن خفيف مما لا يشكل عبء نتيجه الوزن الثقيل على اساسات المنزل ويعيبها قله عدد العمال المتمرسين فى التعامل معها حيث انها سريعه الجفاف وتحتاج لعامل محاره محترف وسريع..
المونه التقليديه : وهى ناتجه عن تخمير خليط من الرمل والاسمنت بنسبه معينه بواسطه الماء النظيف..

يستعان فى عمليه البياض بعامل محاره محترف حيث ان مرحله المحاره هامه جدا فى النتيجه النهائيه لدهان الشقه حيث انه يوجد عيوب لا يمكن مداراتها بالمعجون او الالوان فى مرحله الدهان كانحراف الزوايا او ميول الحوائط وهنا أنصح باستخدام عامل أمين موثوق فيه سبق تجربته ومعروف نتيجه عمله حتى ولو ارتفع أجر تشغيله..

يكون الاتفاق مع عامل المحاره على اساس المتر المربع..كما هو الحال مع عامل تركيب السيراميك...ويكون ذلك بقياش الجدران طوليا وعرضيا وحاصل ضرب الطول فى العرض يكون هو المتر المربع لهذا الجدار...

فمثلا حائط عرض 4 متر وبارتفاع 3 متر للسقف يكون 12 متر مربع ويضرب فى تعريفه المتر حسب الاتفاق...وكذا يتم احتساب االاسقف إما بنفس التسعيره او بسعر أعلى قليلا

أنواع المحاره....مرتبه على حسب التكلفه..

المحاره على البروه..

هى ان يقوم العامل بتغطيه الطوب وتسويه السطح بالبروه وهيا أداه يستخدمها عامل المحاره فى التسويه والخدمه تعطى سطح ناعم ولكن غير متساو إطلاقا وذات منظر مؤذى للعين...

تستخدم فى الاماكن الفقيره جدا وفى الاسوار والواجهات والمناور كتغطيه لطبقه الطوب فقط ومنعا لتعايش الحشرات والزواحف فى شقوق الجدران بدون منظر جمالى وفى الواجهات تستخدم الطرطشه وهى نثر الاسمنت المخلوط بالماء ولون اوكسيد لتعطى منظر مقبول وملون للواجهه..

تمتاز برخص السعر والتوفير فى الخامات ..

المحاره على الدراع :

هى استخدام قضيب طويل من معدن الالومنيوم فى تسويه السطح بعد البروه بتحريكها لاعلى ولأسفل بزاويه 45 درجه ورفع الزيادات عن الحائط بهذه الطريقه لحين تسويه السطح بازاله الزوائد فى المناطق العاليه او التربيه فى المناطق المنخفضه لحين التسويه..

تستخدم فى المحاره الداخليه لجدران الشقق والمساكن وتعطى منظر جمالى جيد تبعا لحرفيه ومهاره العامل القائم بالعمل..

تمتاز بكون الحوائط مستويه وهى افضل بكثييييييير جدا من الطريقه السابقه..

البؤج والاوتار :

أحسن الطرق وافضلها فى النتيجه ولكن أغلاها وأكثرها تكلفه..

تكون بعمل ما يعرف بالبؤج فى اركان الحائط (أربع بؤج) واثنان فى وسط الحائط بالطول على نفس الخط العرضى.بواسطه الاسمنت او الجبس لسرعه جفافه..واستخدام ميزان الخيط وميزان الماء فى تسويه هذه البؤج على خط واحد وبدون اى ميول فى ميزان الماء مما يعنى زياده الارتفاع البؤجه فى المنطقه المنخفضه من الحائط وخفض ارتفاعها فى الاماكن المرتفعه لحين الحصول على بؤج موزونه على خط واحد طوليا وعرضيا..

بعد جفاف البؤج توصل بالأوتار وهيا خطوط من الاسمنت او المونه تصل بين البؤج بخطوط عرضيه وتساوى على نفس ميزان البؤج

وكذلك تجهيز الزوايا على نفس الميزان وتساوى البؤج والاوتار بالميزان لإستخدامها كدليل فيما بعد للذراع الالومنيوم فى التسويه بشكل أكثر دقه للمحاره لتعطى سطح مستو دون اى ميول..
ثم يقوم العامل بملء المنطقه ما بين الاوتار وتسويتها...

يجب اولا التنويه الى انه يتم عمل السقف اولا قبل الحوائط ووزنه بميزان الماء بحيث يكون مستو لإستخدامه فيما بعد كدليل لميول الكمرات الساقطه والكوبيستات...بحيث يستخدم المتر فى القياس لاطول نقطه فيما يعرف باللقطه ويقوم العامل بالتربيه فى الجهه المقابله ليكون الكمر الساقط مستو السطح وبدون ميول من أسفل...

بعد تكسيه الحوائط بالكامل بالمونه يقوم العامل بالخدمه...

والخدمه هى استخدام مونه ناعمه او أقل خشونه عن المونه المستخدمه فى التكسيه فى المرحله الاولى وفردها على سطح الحائط بعد تمام جفافه ثم وباستخدام الماء وبروه الخدمه يقوم بالمسح على السطح ليكون النتيجه الحصول على سطح مصقول وناعم الى حد كبير مما يوفر فى خامات الدهان ولإضفاء شكل جمالى محبب للحائط...

كما يجب مراعاه تخشين الاماكن المراد تركيب فورم جبسيه بها لتسهيل التركيب فيما بعد او فى حاله الرغبه فى تركيب رخام او تكسيات من اى نوع على الحوائط..بعمل خطوط غائره متقاطعه او متوازيه عميقه فى المحاره وهى لينه تكون ظاهره عند تمام الجفاف للحوائط...

يراعى عند عمل السوك الخاصه بالجدران..
والمقضود بالسوك هى الزوايا والبروز فى الحوائط كأطراف الاعمده وما شابه...عدم ترك العامل للتصرف فيها..
فمبدئيا لن يهتم بإخراجها بشكل قائم تماما...كذلك سيقوم بخلط الاسمنت بالجبس كون الجبس سريع الجفاف مما يسهل عليه المهمه ويوفر له فى الوقت والمجهود...
وهنا يجب التنويه عند الاتفاق مع عامل المحاره كون السوك والإمات كما يسمونها لن يوضع بها اى جبس ..
وسوف يجادل العامل معك فى كون ذلك مستحيل ..أخبره بانه يمكن عن طريق جلب عده أدرعه الومنيوم (إده ) وتركها كقالب على الزوايا لحين جفافه فبدلا من جفاف الجبس فى ربع ساعه يكون جفاف الاسمنت فى نصف الى ساعه ويكون ذلك اثناء عمله الاوتار الخاصه بالغرفه..(أى خدمه).

استلام المحاره
يقصد هنا عند انتهاء العامل من المحاره وقيامه بتمتير الشقه( قياسها )..
فى هذه المرحله يفضل عدم قيامك بالاستلام بنفسك....
بمعنى...
عند الاتفاق مع عامل المحاره أخبره بأن الاستلام سيكون بمعرفه مهندس...وفى حاله وجود حوائط غير سليمه مئه بالمئه سيكون الهد والتكسير والمون واعاده المحاره من مصنعيته...(الموضوع ده بيكهرب العامل )..ولا تهتم بكون العامل اتقلب وشه او برطم بكلمتين...فى الخر هيوافق وفصل الخطاب هنا انه لو صنايعى وفاهم شغله مش هيقلق لو هيستلم منه كبير مهندسى القطر المصرى....لكن الافضل الاتفاق من الاول...
عند الاستلام بقى..
يفضل الإستعانه بمهندس فإن لم يتوفر فبفنى خبره او مقاول محاره او مقاول تشطيب فى الاستلام لأكتر من سبب..
اولا المهندس هيبقى فاهم هو بيستلم ايه وازاى يستلم...
لو انت خجول زى حالاتى ومبتعرفش تتعامل مع الصنايعيه خاصه لو الصنايعى كبير فى السن هيترفع عنك الحرج..ومش هيقدر يضحك على المهندس وياكله بالكلام ..
التمتير ليه قواعد منعرفهاش إحنا...إزاى؟؟
مثلا الابواب والشبابيك....
العمل هيضرب طول فى عرض ومش هيخرج الفراغات زى الابواب والشبابيك..عادى ...هيقولك ان السوك بتاخد مجهود وبتاع لكن فى الواقع الحساب بيبقى إزاى؟؟
الابواب بتتحسب من جهه واحده...إزاى برضو؟؟
فوق الباب بيبقى فى حته حوالى متر لغايه السقف حائط يبقى الجهتين حوالى اتنين متر...اللى هو طول الباب مجازا..لو انا او انت اللى بيستلم هتدفع فى الباب ده مرتين لانه هيقيس الحائط مره من جوه الغرفه ومره من بره الغرفه لكن المهندس هيحاسبه من ناحيه واحده ومش هيحسب المتر اللى فوق الباب من الناحيه التانيه...ده مثال للفرق فى الحساب...
يعنى اتعاب المهندس او المقاول هيا نفسها اللى هيوفرهالك فى الحساب تقريبا..
الاستلام بيكون بالذراع الالومنيوم (الإده ) بوضعها على الحائط بزاويه 45 درجه ووضع مصدر إضائه فى الجانب الاخر ومراقبه مسار الحائط فى حاله وجود ارتفاعات او انخفاضات فى الحائط سيظهر النور فى منطقه التقاء الذراع مع الحائط (بيسموها الإده نورت) وتعالج فى حاله الارتفاع بالتكسير واعاده المحاره وفى حاله الانخفاض بلتخشين والمحاره كذلك لحين استواء السطح...
كذلك لإظهار الميول فى الحوائط يوضع ميزان المياه على الذراع بشكل موازى وملاحظه الميزان لمعرفه الميول من اعلى لأسفل...ويلاحظ هنا الاهتمام بالميول الرأسيه فقط كون الميول الافقيه شائعه لكون الحوائط غير عموديه على بعضها (مشطوره بلغه الصنايعيه) ولكن يهتم بها فى حال كون الحوائط عموديه على بعضها...
فى حاله عدم القدره على توفير مهندس او مقاول او الرغبه فى التوفير او ما شابه
يمكن استخدام طريقه السمكرى وبتاع الدوكو ... إزاى؟
المرحله دى بعدها الفورم الجبس والكرانيش والدهانات..
تجيب النفاش وبتاع الكرانيش يستلموا الشقه من بتاع المحاره...
تأكد على النقاش انك هتستلم منه هوه وملكش دعوه والحيطه لو مش زى الإزاز هتخليه يسحب ولو عشر سكاكين معجون بنفس المصنعيه وملكش دعوه...(طبعا ده تهويش بس...عشر سكاكين؟!!..ينهار اسود!!)..
وبتاع الكرانيش ..تأكد عليه انك عايز الكرانيش على الحيط لطش مش عايز تربيات من تحت...يعنى الحيطه تبقى متساويه زى المسطره...
وإن كنت بفضل ان الواحد يستعين بمهندس للإشراف فقط.....والمتابعه...وفى النقطه دى هقول ملحوظه...
فى حاله رغبتك فى مقاول او مهندس يريحك من التعامل مع الصنايعيه ووجع الدماغ قدامك 3 إختيارات....
اول حاجه
مهندس او فنى للإستلام...
وده بيحاسبك بالزياره زى الدكتور والكشف المنزلى (ربنا يعافينا )..لكن ملوش دعوه بالشغل معمول صح ولا غلط قبل كده..والاختيار ده لو عندك عامل معرفه و موثوق فيه وامين جدا جدا..
تانى حاجه
إشراف وإستلام. .
يعنى يشرف على الشغل بزياره للموقع كل يوم او يوم ويوم لمتابعه الشغل والتاكيد على تصحيح الاخطاء وكركبه بطن الصنايعيه..والاستلام فى الاخر..
وده يوفر عليك التكسير واعاده التشغيل ان وجد وكان العامل مش قد كده..
وده لو جايب عامل بتزكيه حد غريب او حد معرفه ومتعاملتش معاه قبل كده..
واتعاب المهندس بتكون فى حدود 10 الميه من التكلفه يعنى لو المحاره مثلا هتكلف 10000 هياخد الف جنيه..
تالت حاجه..
اشراف وتنفيذ..
يعنى المهندس هيشرف ويسلمك ويجيب العمال بمعرفته والمون والخامات..
ودى بتكون اتعابه من 10 الى 15 الميه من التكلفه طبعل وبيحاسبك على المصنعيه عادى...بمعنى...
لو هيجيب عمال بالمتر او اليوميه مش هتفرق انت هتحاسب بالمتركأن الصنايعى من بره وهتدفع تمن الخامات والنقل والمشال وكل حاجه...
الاختيارات دى تتوقف عليك انت ورغبتك......ولك الاختيار...
كده احنا خلصنا المحاره ..واستلمنا من المحار وهندخل المرحله اللى بعد كده..

المرحله السادسه...
المصيص والكرانيش...
يقصد بالمصيص للأسقف تكسيه الاسقف بالجبس لسهوله تشكيله وسرعه جفافه وشكله الجمالى والمصيص هو نوع من الجبس مخصص للديكورات الجبسيه والكرانيش لشده بياضه وسرعه جفافه..
أفضل انواع جبس المصيص بشهاده عمال الكرانيش هو اسمنت سيناء من انتاج عثمان احمد عثمان..وكذلك اعلاها ثمنا....ويلاحظ انواع اخرى تحمل اسم سيناء ولكن ليست نفس المنتج..كرواد سيناء ...ونجمه سيناء .....وزهره سيناء...و.......
يبدء عمل المصيص والكرانيش والديكورات الجبسيه بعد المحاره مباشره او بعد تمام جفاف الحوائط....
يقوم بالمهمه عامل المحاره فى حاله المصيص وكذلك سيعرض عليك تركيب الكرانيش.....
إلا انه فى وجه نظرى الشخصيه ...الكرانيش لها عماله متخصصه ماهره جدا فى تخصصها كما ان تركيب الكرانيش بمعرفه المحار سيجعله قادر على مداراه عيوب الحوائط والاسقف بالتربيات الجبسيه دون ملاحظه منك ودون الاشاره الى ذلك....
فالافضل الاستعانه بمتخصص فى تركيب الكرانيش أوفر وأسرع وأحسن.....
الاتفاق على الكرانيش يكون بالمتر الطولى.....
بمعنى ان الغرفه مساحتها 3 * 4
يتم احتساب الكرانيش ...3+4*2=14 متر طولى...
كذلك يمكن تركيب ما يعرف بالصره فى وسط السقف والبانوهات كما بالصور السابقه...
والغرض من كل ما سبق هو عمل اشكال ديكوريه للغرفه لتزيينها والوصول لمنظر جمالى مريح للعين بعد الدهان والتلوين...
يختلف تعريفه المتر الطولىحسب طبيعه الشغل ونقشه والمنطقه ومهارتك فى الفصال.....
فالمتر يبدأ من 10 جنيهات ووصولا ل18 و 20 جنيه...بدون المون....
ويوجد طريقتان لتركيب الكرانيش الجبسيه.....
الطريقه الاولى ...طريقه الجر......
وهى باستخدام اسطمبه من الحديد بشكل معين فى تشكيل الجبس على الحائط بتمريرها على ما يشبه الذراع الالومنيوم لينتج عنها شكل معين أفقى يشبه الاشكال فى الصوره الاولى والثانيه....
الطريقه الثانيه.....طريقه الصب والتركيب....
وهى باستخدام فورم واسطمبات جاهزه وصب الكرانيش على الارض ثم تركيبها وتثبيتها على الحائط بالجبس..
والطريقه الاولى تصلح للاشكال الساده فقط بينما الطريقه الثانيه تصلح للساده والمنقوشه...

يجدر الاشاره الى أن الديكورات لم تعد مقصوره على الجبس فقط...بل ظهرت خامات جديده مثل الفوم وهو ماده تشبه الفوم المستخدم فى التغليف ولكن بسطح مصقول وقدره تحمل عاليه...ويتميز بخفه الوزن وسهوله التركيب وامكانيه تركيبه بعد الدهان فى حاله الرغبه فى تزيين شقه سابقه التجهييز او السكن ويثبت على الحائط بواسطه ماده لاصقه مخصوصه...وهو متوافر بعده ماركات أشهرها على الاطلاق الفيوتك....ونجده لدى مراكز تلوين البويات بالكمبيوتر والمحلات الخاصه بالديكورات....
ويعيب الكرانيش الفوم إرتفاع ثمنها نسبيا بالنسبه للجبس...كذا محدوديه الاشكال وقدم الموديلات المتوفره منه.....بمعنى ان اسطمبات الجبس دائمه التجديد والابتكار بينما لا تتغير اشكال الفوم الا بمرور فنرات طويله مما يحدد الاختيار بصوره كبيره...
يجدر كذلك الاشاره الى ان استخدام الجبس فى الديكور لا يقتصر على الكرانيش و حليه الزوايا (الكوابيل ) والصرر للسقف...
فيوجد ما يسمى ببيت النور وهو بجعل الكورنيش بيتا للإضائه البيضاء او الملونه وللإسبوتات الموجهه لأسفل باشكال مختلفه..
كذلك الاسقف المعلقه والجيبسون بورد وهى بلاطات جبسيه بمقاسات مختلفه حسب الاحتياج وتستخدم فى عمل سقف صناعى فى حاله الرغبه مثلا فى عمل تكييف مركزى او سماعات داخليه او تركيب نظام انذار للحريق او نظام مراقبه وكاميرات....

كما يمكن عمل اشكال بالجبس كالاعمده وتكون بعمل تلبيشان بالاسمنت على سلك بقلاوه مغلف لاسياخ حديديه ملحومه بالشكل المطلوب لتكون الشكل النهائى المراد الحصول عليه بعد كسوتها بطبقه من الجبس ناعمه ومصقوله....ويراعى هنا فى حاله عمل حائط او فواصل بهذه الطريقه استخدام سلك بالمقاس المناسب حتى لا يحدث شقوق او شروخ بعد الانتهاء من الحبس فى منطقه التقاء القطعتين...
الا انه فى رأيى الشخصى كلما كان الديكور بسيطا خاليا من البهرجه والتكلف كلما كان أجمل ودليل على رقى الذوق....

بعد الكرانيش تيجى المرحله التاليه.....

التأسيس للدهانات

يقصد بالتأسيس لدهانات الحوائط:-
سد مسام المحاره وتسويه الحوائط وتكسيتها لصقلها ومداراه الخشانه الناتجه عن عمليه المحاره كون الاسمنت والرمل مزيج لا يعطى سطح مصقولا وإعطائها المظهر الجمالى المحبب بعد الدهان النهائى والتغلب على عيوب المحاره البسيطه ومداراتها بالمعجون...
لماذا التأسيس للدهان الأن....؟
نقوم بالتأسيس بعد تمام جفاف المحاره والكرانيش وقبل تركيب البلاط او السيراميك او الارضيات بصفه عامه...
وذلك لتفادى سواقط المعجون والمواد المستخدمه فى الدهان من السقوط والإلتصاق بالأرضيه وبذل مجهود كبير فى ازالتها او التنظيف للأرضيه.. يعنى السيراميك يركب على نظافه ويبقى يتفرش عليه مشمع تقيل عشان النقط اللى هتقع من الدهان او مطرح البستله او الجردل المستخدم فى الدهان وسواقط تنظيف الفرش والرولات....وأثار أقدام العمال اللى هتدوس فى النقط والبواقى على الأرض وتمشى فى كل حته فى الشقه تطبع فيها أثر رجليه....

خطوات التأسيس للدهانات....
تنظيف الحوائط والأرضيات من سواقط الجبس والأسمنت..يقوم العامل المختص بالدهان الملقب بالنقاش باستخدام ما يسمى بسكينه المرشمه لإزاله اى سواقط عالقه بالحائط كما يقوم بالصنفره باستخدام صنفره خشنه...ملحوظه هامه...
تتسبب سواقط الجبس لما تحويه من ماده الجير فى تفكك السيراميك عن الأرضيات على المدى الطويل لذا يجب تنظيف الأرضيه تماما من أى بواقى او سواقط جبسيه...

دهان السيلر أو البرايمر ...
المرحله التاليه لتنظيف الحوائط هى سد مسام المحاره بإستخدام ماده لسد المسام تختلف مسمياتها او نوعها ولكن فى النهايه الوظيفه واحده وهى سد مسام المحاره حتى لا تتشرب الدهان سواء بإستخدام السيلر أو البرايمر أو الغراء أو ما شابه....
ويكون الدهان بإستخدام الفرشاه أو الروله....ويراعى سرعه تحريك الروله او الفرشه لسرعه جفافه وحتى لا يحدث خط بارز فى الحائط نتيجه وجود فواصل فى الدهان....
سحب سكينه معجون أولى..
بعد تمام جفاف السطح المراد دهانه يقوم العامل بإزاله أى زوائد بواسطه صنفره متوسطه الخشونه....ومن ثم بعد تنظيف السطح من عوالق الصنفره يقوم بسحب سكينه معجون فى اتجاه طولى...أو عمودى....
وهنا يختلف المعجون تكوينا بحسب نوع الدهان المراد إستخدامه....
ففى حاله الدهان المائى ...
أى استخدام دهانات ذات قاعده مائيه يمكن التأسيس بمعجون مائى ومتوفر منه أنواع عديده معده للإستخدام مباشره بإضافه القليل من الماء....
وفى حاله الدهان الزيتى أى استخدام دهان ذو أساس زيتى يجب التأسيس بمعجون يطلق عليه معجون بلدى...ويتكون من زنك ..إسبيداج ..زيت مغلى.. غراء..........وويقوم بإعداده عامل الدهان بنفسه ...
ألا أنه يمكن إستخدام الدهان ذو القاعده المائيه على الأسطح المجهزه سواء بمعجون ذو قاعده مائيه او زيتيه...لكن لا يمكن استخدام طلاء زيتى على معجون مائى....
ويعد التأسيس الزيتى عملا مرهقا للعامل عن التأسيس المائى الا أنه يفضل استخدامه فى الأدوار الأرضيه كونه مقاوم أكثر للرطوبه عن المائيه...إلا أنه الأن يفضل معظم الناس استخدام المعجون المائى نظرا لسرعه تنفيذه وتواضع تكلفته نسبيا ...
وبعد تمام الجفاف يقوم العامل بالصنفره وصقل السطح للسحبه الأولى.....
يقوم العامل بسحب السكينه الثانيه بصوره افقيه أو عرضيه بعد إضافه بعض اللون له ليسهل تمييز الأماكن التى لم يصل لها المعجون فى السكينه الثانيه..وتكرار الخطوه السابقه للسحبه الثانيه بالصنفره وصقل السطح...
وعند تمام الجفاف يقوم العامل بسحب السكينه الثالثه وتكون بطبقه رقيقه على السطح لمداراه عيوب البروه المستخدمه فى المحاره ..ولا يمكن للعامل مهما كانت خبرته ومهما قال لك أن يقوم بإستعدال عيوب أو دورانات الحائط بإستخدام المعجون...كون المعجون يتشقق فى حال استخدام طبقه كثيفه...
عند تمام جفاف المعجون للسكينه الثالثه نقوم بصنفره الحوائط وتنظيفها من غبار الصنفره....
دهان البطانه...
المقصود بالبطانه هى طبقه الدهان الأوليه وتستخدم فى تبطين الحوائط لتمام تكسيه الحوائط فى الوجهيين التاليين...
يستخدم فى البطانه ما يسمى الدهان الإقتصادى....
بمعنى وللتوضيح فى حاله الدهان المائى القاعده أو كما يعرف بدهان البلاستيك...يكون البطانه بإستخدام البلاستيك الإقتصادى على سبيل المثال سايبس 700 او جى ال سى 30 30...من الدهانات التى تتحمل الدهان ببلاستيك عالى الجوده عالى نسبه الأكريلك فى الطبقات التاليه بدون مشاكل....
والغرض من استخدام بلاستيك اقتصادى..هو عدم جدوى استخدام بلاستيك عالى الجوده فى الطبقات الأولى عالى التكلفه مما يمثل إهدار للمال بدون داعى...كما انه يتم اعاده دهان الحائط بطبقه تاليه لتمام التكسيه....
كذلك الحال يتم تبطين الكرانيش والسقف...
وبذلك يكون تم الإنتهاء من مرحله التأسيس للدهانات
كتابة وتنسيق : فريق عمل مامتيديو
#مامتيديو